Yaxshi niyatning savobi tayin.

Abdulloh ibn Umarning o’g’li Solim xalifa Umar ibn Abdulazizga yozgan maktubida bunday degan edi: “Shuni yaxshi bilingki, Allohning bandaga yordami bandaning niyati qadardir. Kimning niyati  butun bo’lsa, Allohning unga bergan madadi ham butun bo’ladi. Qanchalik insonning niyati ozaysa, Allohning unga berdigan ko’magi shuncha kamayadi”.
  
  “Amallar niyatlarga ko’radir” hadisini Islom ulammolari turlicha izohlashadi. Ba’zilar “Amallarning sahih yo fosid, maqbul yo nomaqbul bo’lishi niyatga bog’liqdir” deya ixtiyoriy amallarning niyatiga qarab baholanishini talqin qilishadi. Niyatlar amallarni bir-biridan ayirgani kabi, amalning Alloh uchun xolis yo bunday emasligi ham niyatga bog’liqdir.
Niyati bo’lmaganning amali ham yo’q. Amalsiz so’z foydasizdir. So’z va amal ham niyatsiz foyda bermaydi. So’z va amal sunnatga mos bo’lganda ibodat sanaladi. Niyat amaldan ham xayrlidir, chunki amal niyat bilan tirikdir. Xayr niyatida mujassam. Niyat amalga oshmagan bo’lsa ham savobi bor. Niyat amalga oshmagan bo’lsa ham savobi bor. Niyatni fasoddan saqlash amaldan ham xayrlidir. 
Qalbning sog’lomliligi amal sog’lomligidan, amalning sog’lomliligi esa niyatning ezguligidandir. Qancha kichik amallar borki, niyat tufayli katta bo’ladi. Qancha katta amallar borki niyat tufayli kichrayib ketadi. Amal uch narsa bilan tugal bo’ladi-taqvo, sobitlik va niyat….. Alloh insondan faqat to’g’ri va irodani xohlaydi. Allohning rizosini istash esa ibodatlarning a’lolaridandir. Amallarning eng xayrlisi Alloh zimmamizga farz qilganlarni bajarish, halolga intilib, haromdan saqlanish, shuni astoyidil niyat qilishdir. 
Niyat bir ishni Alloh rizosi uchun qilishni qalbdan o’tkazishdir. Ish qalb, til yo boshqa a’zolari orqali bajariladi. Qalb bilan qilinajak ishlar niyat va o’ylarimizdir. Til bilan qilinadigan ishlarimiz so’zimizdir. Vujudimiz bilan qiladigan ishlarimiz  fel va harakatlarimizdir. So’z va harakatlarimiz niyatga bog’liq bo’lgani uchun yaxshi niyat ba’zan ibodatga teng sanaladi.  Masalan, yo’ldagi toshni odamlarga zarar bermasin degan niyatda olib tashlash savob ish. Birovning haqini yeyish imkoni bo’lganda Allohdan qo’rqib,bu fikrdan qaytish ham xuddi shunday savob keltiradi. Demak. Qalbdan o’tadigan tushunchalar yaxshi niyatga aylangan chog’i Alloh nazdida qadr topadi. Zero, Alloh shakl-shamoyilinimizga emas, qalbimizga, niyatimizfa qaraydi.

Buxoro shahar Jo’ybori kalon ayol-qizlar 
o’rta maxsus islom ta'lim muassasasi
o’qituvchisi Shaxnoza Razzoqova.